កម្លាំងនគរបាលក្នុងឱកាសកាន់វេនបិណ្ឌ ចាប់ខ្លួនជនសង្ស័យជាបន្តបន្ទាប់ ចំនួន៤នាក់ និងវត្ថុតាងមួយចំនួន
06-October-2015 | ដោយ ខ្លុយខ្មែរ-ID-3
បន្ទាយមានជ័យ៖ ក្នុងឱកាសកាន់បិណ្ឌនេះកម្លាំងនគរបាលប្រឆាំងគ្រឿងញៀន បានបើកប្រតិបត្តិការបង្ក្រាបគ្រឿងញៀន ចាប់ឃាត់ខ្លួនជនសង្ស័យជួញដូរនិងប្រើប្រាស់គ្រឿងញៀនជាបន្តបន្ទាប់ ដោយឡែកពីគ្នា ក្នុងខេត្ត បន្ទាយមានជ័យ ។
លោកវរសេនីយ៍ទោធិន ស៊ីនដេត នាយការិយាល័យ នគរបាលប្រឆាំងគ្រឿងញៀនខេត្ត បានឲ្យដឹងថា៖ដោយអនុវត្តនូវបទបញ្ជារបស់លោកឧត្តមសេនីយ៍ត្រី អាត់ ខែម ស្នងការនគរបាលខេត្តបន្ទាយមានជ័យ និង លោកការណែនាំផ្ទាល់ពីលោកវរសេនីយ៍ឯក ចាប សុផាប្ញទ្ធិ ស្នងការរង ជាប្រធានការិយាល័យ កណ្តាលប្រឆាំងបទល្មើស ព្រមទាំងមានការសម្របសម្រួលពីលោក ផាន់ វណ្ណរ័ត្ន ព្រះរាជអាជ្ញាអមសាលាដំបូងខេត្តបន្ទាយមានជ័យ ។ នៅវេលាម៉ោង៣និង១៥នាទីល្ងាច ថ្ងៃទី៥ ខែតុលា ឆ្នាំ២០១៥ កម្លាំងនគរបាលប្រឆាំងគ្រឿងបានចុះប្រតិបត្តិការបង្ក្រាប ករណីជួញដូរនូវសារធាតុញៀនខុសច្បាប់ចំនួន២កន្លែងដោយឡែកពីគ្នា ដំបូងគឺបានធ្វើការចាប់ឃាត់ខ្លួនជនសង្ស័យជួញដូរគ្រឿងញៀនម្នាក់ ឈ្មោះអៀង សុវណ្ណា ( ហៅឆែប) ភេទប្រុសអាយុ២៨ឆ្នាំ នៅភូមិសែសិន សង្កាត់អូរអំបិល ក្រុងសិរិសោភ័ណ ខេត្តបន្ទាយមានជ័យ ដោយដកហូតបានថ្នាំញៀនប្រភេទមេតំហ្វេតាមីនអាយស៍ (ម៉ាទឹកកក) ចំនួន៣កូនថង់តូច រួចក៏បានបន្តទៅចាប់ឃាត់ជនសង្ស័យម្នាក់ទៀតឈ្មោះស៊ិន បារាំង ភេទប្រុសអាយុ២៣ឆ្នាំ នៅភូមិ អណ្តូងថ្លុង ឃុំគំរូ ស្រុកថ្មពួក ខេត្តបន្ទាយមានជ័យ ដកហូតបានវត្ថុតាងថ្នាំញៀនប្រភេទមេតំហ្វេតាមីនអាយស៍ចំនួន៤កូនថង់ ទូរស័ព្ទដៃចំនួន២គ្រឿង,ម៉ូតូ១គ្រឿង,និងបានឃាត់ខ្លួនមុខសញ្ញាអ្នកប្រើប្រាស់គ្រឿងញៀនចំនួន២នាក់ទៀត សរុបទាំងអ្នកប្រើប្រាស់ និងជួញដូរ ចំនួន ៤នាក់ ថ្នាំញៀនចំនួន៧កូនថង់។
លោកនាយការិយាល័យបានបញ្ជាក់ថា បច្ចុប្បន្នជនសង្ស័យ រួមទាំងវត្ថុតាង ត្រូវបានកម្លាំងនគរ បាលជំនាញប្រឆាំងគ្រឿងញៀន រៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ ការតាមនិតិវិធីច្បាប់រួចហើយដែរ៕
ចំនួនអ្នកទស្សនា
- ថ្ងៃនេះ2121
- ម្សិលមិញ3151
- សប្តាហ៍នេះ31951
- ខែនេះ17341
- ឆ្នាំនេះ17341
- សរុប20459797